Nashik MNC Case : महाराष्ट्रातील नाशिकमध्ये एका नामांकित मल्टीनॅशनल कंपनीत (MNC) महिला कर्मचाऱ्यांवर लैंगिक शोषण, मानसिक छळ आणि धार्मिक भावना दुखावण्याचे गंभीर आरोप समोर आले आहेत. या प्रकरणाने संपूर्ण राज्यात खळबळ उडाली असून, कॉर्पोरेट क्षेत्रातील महिला सुरक्षेबाबत पुन्हा प्रश्नचिन्ह उपस्थित झाले आहे.

8 पीडितांनी दाखल केली तक्रार

या प्रकरणात तब्बल 8 महिला कर्मचाऱ्यांनी पोलिसांत तक्रार दाखल केली आहे. विशेष म्हणजे, यापैकी बहुतांश पीडितांचे वय 18 ते 25 वर्षांच्या दरम्यान आहे. त्यामुळे या घटनेचे गांभीर्य अधिक वाढले आहे.

नेमके आरोप काय आहेत?

तक्रारीनुसार अनेक धक्कादायक बाबी समोर आल्या आहेत:

काही आरोपींनी महिला कर्मचाऱ्यांवर अश्लील टिप्पणी करत जबरदस्ती शारीरिक संबंध ठेवण्याचा प्रयत्न केला
ऑफिस परिसरातच छेडछाड आणि लैंगिक अत्याचार केल्याचे आरोप
धार्मिक भावना दुखावणारे वक्तव्य आणि धर्मांतराचा दबाव टाकल्याचा आरोप
एका पुरुष कर्मचाऱ्यालाही जबरदस्तीने धार्मिक प्रथा पाळण्यास भाग पाडले
महिलांच्या वैयक्तिक आयुष्यावर, लग्न आणि मातृत्वावर अपमानास्पद टिप्पणी

HR विभागावरही आरोप

या संपूर्ण प्रकरणातील सर्वात धक्कादायक बाब म्हणजे, पीडितांनी HR विभागाकडे तक्रार केल्यानंतरही कोणतीही ठोस कारवाई करण्यात आली नाही. उलट, “मोठ्या कंपन्यांमध्ये हे सामान्य आहे” असे सांगून प्रकरण दाबण्याचा प्रयत्न केल्याचा आरोप आहे. यामुळे HR विभागातील एका महिला अधिकाऱ्यावरही गुन्हा दाखल करण्यात आला आहे.

SIT ची स्थापना, तपास सुरू

प्रकरणाची गंभीरता लक्षात घेता नाशिक पोलिसांनी असिस्टंट पोलिस कमिश्नर यांच्या नेतृत्वाखाली विशेष तपास पथक (SIT) स्थापन केले आहे.
पोलीस सध्या तपास करत आहेत की हा प्रकार केवळ कंपनीपुरता मर्यादित आहे की यामागे आणखी मोठे नेटवर्क आहे.

आंदोलनांना सुरुवात

ही घटना कंपनीच्या चार भिंतीबाहेर येताच नागरिकांमध्ये संतापाची लाट उसळली आहे. महिला सुरक्षेच्या मुद्द्यावर विविध ठिकाणी आंदोलन सुरू झाले असून, दोषींवर कठोर कारवाईची मागणी केली जात आहे.