Puri Jagannath Temple Terror Attack Threat : ओडिशातील पवित्र श्री जगन्नाथ मंदिर पुन्हा एकदा सुरक्षेच्या दृष्टीने चर्चेत आले आहे. बुधवारी सकाळी मंदिराच्या परिक्रमा मार्गाजवळील भिंतींवर दहशतवादी हल्ल्याची धमकी देणारे हस्तलिखित संदेश आढळून आले. या धक्कादायक घटनेमुळे श्रद्धाळू, स्थानिक प्रशासन आणि सुरक्षा यंत्रणा तात्काळ सतर्क झाल्या आहेत.
काय लिहिलं होतं धमकीच्या संदेशात?
सूत्रांच्या माहितीनुसार, हे धमकीचे संदेश बालीसाही येथील मां बुढ़ी ठाकुरानी मंदिराच्या भिंतींवर दोन ठिकाणी लिहिलेले आढळले. संदेशात स्पष्टपणे लिहिले होते, “आतंकवादी श्रीमंदिर उद्ध्वस्त करतील. मला फोन करा, नाहीतर विनाश होईल” यासोबत अनेक मोबाईल नंबर लिहिलेले होते आणि पंतप्रधान नरेंद्र मोदी यांचं नावसुद्धा नमूद होतं. इतकंच नव्हे तर, मंदिराजवळ लावलेल्या काही डेकोरेटिव्ह लाईट्सची तोडफोड करण्यात आली होती.
दहशतवादी कट की खोडसाळपणा?
या घटनेमुळे अनेक प्रश्न निर्माण झाले आहेत – हे खरोखरच दहशतवादी कटाचा भाग आहे की कुणाचा खोडसाळपणा? कोणीतरी दहशतवाद्यांचं नाव घेऊन अशा प्रकारे धमकी का दिली? याचा उलगडा करण्यासाठी पुरी पोलिसांनी युद्धपातळीवर चौकशी सुरू केली आहे.
Graffiti threatening 'demolition' of Jagannath Temple in Puri foundhttps://t.co/046DifiVdG#Jagannath #Puri #Graffiti #Odisha #OdishaPolice pic.twitter.com/0B6oL5cz36
— NewsDrum (@thenewsdrum) August 13, 2025
हेही वाचा – Video : जया बच्चन पुन्हा चर्चेत! सेल्फी घेण्यासाठी आलेल्या फॅनला दिला जोरदार धक्का, पाहणारे थक्क
CCTV तपास आणि सुरक्षा वाढवली
मंदिर परिसर आणि आसपासच्या आधीपासून लावलेल्या CCTV कॅमेर्यांचे फुटेज तपासले जात आहेत. त्याचबरोबर, सुरक्षा रक्षकांची संख्या वाढवण्यात आली आहे. पोलिसांनी सांगितलं की, या प्रकरणाची सखोल चौकशी सुरु असून कोणताही धोका टाळण्यासाठी सर्व उपाययोजना केल्या जात आहेत.
काही दिवसांपूर्वीची संशयास्पद घटना
ही घटना अशा वेळी घडली आहे जेव्हा 29 जुलै रोजी एका तरुणाला मंदिरात लपविलेल्या कॅमेरासह पकडण्यात आलं होतं. त्याने आपल्या चष्म्यात स्पेशल लेंस लावून मंदिराचे फोटो आणि व्हिडिओ काढले, जे थेट त्याच्या मोबाईलवर जात होते. संशयास्पद हालचाल लक्षात येताच त्याला बेहरण द्वार येथे अडवण्यात आले आणि कॅमेरा जप्त करण्यात आला. मागील 10 दिवसांत तिघांकडून अशा प्रकारचे गुप्त कॅमेरे जप्त करण्यात आले आहेत. याच साखळीत, मंदिराच्या पश्चिम द्वारातून प्रवेश करण्याचा प्रयत्न करणाऱ्या पश्चिम बंगालच्या प्रितीश पाल याला सुरक्षा रक्षकांनी अटक केली असून त्याची चौकशी सुरू आहे.
सुरक्षा व्यवस्थेत मोठी वाढ
अधिकाऱ्यांनी सांगितलं की, प्रकरणाच्या गंभीरतेमुळे श्री जगन्नाथ मंदिराची सुरक्षा आणखी मजबूत करण्यात आली आहे. मंदिराची पवित्रता आणि सुरक्षा कायम राखण्यासाठी पोलिस, मंदिर प्रशासन आणि विशेष सुरक्षा दल पूर्ण सतर्क आहेत.
वारंवार सुरक्षा प्रश्नचिन्ह
पुरी श्री जगन्नाथ मंदिराच्या सुरक्षेबाबत पूर्वीपासूनच प्रश्नचिन्ह राहिले आहे. ड्रोन उडविण्याचे प्रकार, संशयास्पद व्यक्तींची हालचाल आणि आता थेट दहशतवादी हल्ल्याची धमकी – या साऱ्या घटनांमुळे मंदिर सुरक्षा यंत्रणेवर मोठा ताण आला आहे.
‘वाचा मराठी’चे व्हॉट्सॲप चॅनेल येथे फॉलो करा!
‘वाचा मराठी’चा व्हॉट्सअप ग्रुप जॉईन करण्यासाठी येथे क्लिक करा
वाचा मराठी’चा व्हॉट्सअप ग्रुप-3 जॉईन करण्यासाठी येथे क्लिक करा!
‘वाचा मराठी’चा व्हॉट्सअप ग्रुप-2 जॉईन करण्यासाठी येथे क्लिक करा!