Hair Dye And Cancer : केस काळे करण्याची परंपरा भारतात फार जुनी आहे. पूर्वीच्या काळी मेंदीसारख्या नैसर्गिक गोष्टी वापरल्या जायच्या, पण आजच्या युगात केमिकलयुक्त हेअर डाय वापरणं सामान्य झालं आहे. मात्र एक प्रश्न अनेकांना सतावत आहे — हेअर डायमुळे खरंच कॅन्सर होतो का?

5000 पेक्षा जास्त केमिकल्स – धोका किती गंभीर?

न्यूज 18 हिंदीच्या वृत्तानुसार, क्लीव्हलँड क्लिनिकचे कॅन्सर तज्ज्ञ डॉ. चिराग शाह आणि डॉ. टिफनी ओंजेर यांच्यानुसार, बाजारात मिळणाऱ्या हेअर डायमध्ये 5000 पेक्षा अधिक केमिकल्स असतात. हे केमिकल्स शरीरातील हार्मोन्सच्या पातळीत बदल करू शकतात, जे कधी कधी कॅन्सरसारख्या गंभीर आजारांना कारणीभूत ठरू शकतात.

काही अभ्यासांमध्ये हेअर डायमुळे ब्लॅडर कॅन्सर, ब्रेस्ट कॅन्सर, ब्लड कॅन्सर, स्किन कॅन्सर आणि युटेरिन कॅन्सर यांचा धोका वाढतो असंही आढळलं आहे.

हेही वाचा – आधार अपडेटचं नवं संकट! नाव बदलायचंय? आता 700 रुपये मोजा!

WHO आणि IARC काय म्हणतात?

वर्ल्ड हेल्थ ऑर्गनायझेशन (WHO) आणि इंटरनॅशनल एजन्सी फॉर रिसर्च ऑन कॅन्सर (IARC) च्या मते, वैयक्तिक वापरासाठी केल्या जाणाऱ्या हेअर डायमुळे कॅन्सरचा थेट संबंध सिद्ध झालेला नाही. म्हणजेच, आपण स्वतःसाठी केस रंगवत असाल, तर फारसा धोका नाही.

पण जे लोक सलूनमध्ये हेअर ड्रेसर म्हणून काम करतात, त्यांना सतत केमिकल्सचा संपर्क असल्यामुळे त्यांच्यासाठी धोका अधिक असतो. IARC च्या मते, हे लोक कॅन्सरजन्य रसायनांच्या जास्त संपर्कात असतात.

डाय वापरायचा की नाही? तज्ज्ञांचं मत काय?

डॉ. चिराग शाह सांगतात की, आजच्या काळात आपण दररोज शेकडो कॅन्सरजन्य घटकांच्या संपर्कात असतो. हेअर डाय त्यातलाच एक घटक आहे. यामुळे घाबरण्याची गरज नाही, पण जागरुकता आवश्यक आहे.

जर तुम्ही आरोग्याबद्दल जागरूक असाल, तर फक्त हेअर डाय नव्हे तर इतरही अनेक कॅन्सरजन्य गोष्टी टाळणं गरजेचं आहे — जसं की घरातले क्लीनर, सिगरेट, प्रदूषण इत्यादी.