IAS Officer Sanjeev Khirwar Controversy : दिल्लीतील क्रीडा क्षेत्राला हादरवून टाकणाऱ्या वादानंतर चर्चेत आलेले IAS अधिकारी संजीव खिरवार पुन्हा एकदा राजधानीच्या सत्ताकेंद्रात परतले आहेत. कुत्रा फिरवण्यासाठी खेळाडूंना स्टेडियममधून बाहेर काढल्याचा आरोप झेललेले खिरवार यांची आता थेट दिल्ली महानगरपालिकेच्या (MCD) आयुक्तपदी नियुक्ती झाली आहे. या निर्णयामुळे राजकीय, प्रशासकीय आणि सोशल मीडियावर मोठी चर्चा रंगली आहे.

नेमकं प्रकरण काय?

2022 साली दिल्लीतील त्यागराज स्टेडियम संदर्भात एक धक्कादायक प्रकार समोर आला होता. त्या काळात दिल्ली सरकारचे प्रमुख सचिव (महसूल) असलेले संजीव खिरवार यांच्याबाबत असा आरोप करण्यात आला की, खेळाडूंना संध्याकाळी लवकर मैदान सोडण्यास सांगितले जात होते, कारण अधिकाऱ्यांना कुत्रा फिरवायचा होता.

एका प्रशिक्षकाने दिलेल्या माहितीनुसार, “आम्ही आधी रात्री 8 ते 8.30 वाजेपर्यंत सराव करत होतो. पण आता 7 वाजेपर्यंत मैदान रिकामं करायला सांगितलं जातं. आमचा सराव पूर्णपणे बिघडला.” या खुलाशानंतर संपूर्ण देशात संतापाची लाट उसळली होती.

खिरवार यांचं स्पष्टीकरण

या प्रकरणावर प्रतिक्रिया देताना संजीव खिरवार यांनी आरोप “पूर्णपणे चुकीचे” असल्याचे सांगितले होते. आपण कधी कधी कुत्रा फिरवायला जातो, मात्र त्यामुळे खेळाडूंच्या सरावावर परिणाम झाला नसल्याचा दावा त्यांनी केला.

हेही वाचा – BMC Election 2026 : मुंबई महापालिकेतील नगरसेवकांचा पगार किती?

राजकीय हालचाली आणि बदली

या वादानंतर तत्कालीन मुख्यमंत्री अरविंद केजरीवाल यांनी सर्व सरकारी क्रीडांगणं रात्री 10 वाजेपर्यंत खुली ठेवण्याचे आदेश दिले होते. तसेच केंद्र सरकारने खिरवार यांची लडाख येथे बदली केली होती.

आता पुन्हा दिल्लीत पुनरागमन

सुमारे दोन वर्षांनंतर संजीव खिरवार यांची पुन्हा दिल्लीत नियुक्ती झाली असून, त्यांना दिल्ली महानगरपालिकेचे आयुक्त (MCD Commissioner) म्हणून जबाबदारी देण्यात आली आहे. सध्याचे आयुक्त अश्विनी कुमार यांची जम्मू-काश्मीरला बदली करण्यात आली आहे.