Maharashtra Panchayat Samiti Election Results : धाराशिव जिल्ह्यातील ढोकी पंचायत समिती निवडणूक निकालाने संपूर्ण महाराष्ट्राचे लक्ष वेधून घेतले आहे. अत्यंत चुरशीच्या आणि थरारक लढतीत उद्धव बाळासाहेब ठाकरे यांच्या नेतृत्वाखालील शिवसेनेचे उमेदवार अमर समुद्रे यांनी भाजपच्या उमेदवाराचा अवघ्या एका मताने पराभव केला.
सोमवारी टपाल मतदानाची मोजणी पूर्ण झाल्यानंतर हा निकाल स्पष्ट झाला. अमर समुद्रे यांना टपाल मतदानातून दोन अतिरिक्त मते मिळाल्याने त्यांचा एकूण मतसंख्या 3187 इतकी झाली. दुसरीकडे भाजपचे उमेदवार निहाल काझी यांना 3186 मते मिळाली. या मतांमध्ये तीन टपाल मते समाविष्ट होती. त्यामुळे फक्त एक मत संपूर्ण निकालाचे पारडे फिरवणारे ठरले.
या निवडणुकीत ‘नोटा’ (वरीलपैकी कोणीही नाही) या पर्यायाला 56 मतदारांनी पसंती दिली, ज्यामुळे लढत किती अटीतटीची होती, हे स्पष्ट झाले. जर ही मते एखाद्या उमेदवाराकडे वळली असती, तर निकाल वेगळा असण्याची शक्यता होती.
हेही वाचा – राजकारण, पैसा आणि क्रिकेट! भारत-पाक सामना न झाल्यास 2200 कोटींचा फटका
दरम्यान, राज्यभरात 12 जिल्हा परिषद आणि 125 पंचायत समित्यांच्या निवडणुकांसाठी मतमोजणी प्रक्रिया सुरू असून, सर्व राजकीय पक्षांचे लक्ष या निकालांकडे लागले आहे. ही निवडणूक स्थानिक स्वराज्य संस्थांच्या राजकारणात महत्त्वाची मानली जात आहे.
मतदानाची टक्केवारी
राज्य निवडणूक आयोगाच्या माहितीनुसार, या निवडणुकांमध्ये 68.28 टक्के इतकी सरासरी मतदान टक्केवारी नोंदवण्यात आली. परभणी जिल्ह्यात सर्वाधिक 74.89 टक्के मतदान, तर रत्नागिरी जिल्ह्यात सर्वात कमी 55.79 टक्के मतदान झाले.
कोल्हापूरमध्ये 74.45 टक्के, तर छत्रपती संभाजीनगरमध्ये 72.69 टक्के मतदान झाले. रायगड, रत्नागिरी, सिंधुदुर्ग, पुणे, सातारा, सांगली, सोलापूर, कोल्हापूर, छत्रपती संभाजीनगर, परभणी, धाराशिव आणि लातूर या जिल्ह्यांमध्ये शनिवारी मतदान प्रक्रिया पार पडली.
या निवडणुकांमध्ये 731 सदस्यांची निवड होणार असून, त्यासाठी 2624 उमेदवार निवडणूक रिंगणात होते.
निवडणूक पुढे ढकलण्याची पार्श्वभूमी
या निवडणुका मूळतः 5 फेब्रुवारी रोजी होणार होत्या, मात्र उपमुख्यमंत्री अजित पवार यांच्या निधनानंतर राज्यात तीन दिवसांचा शोक जाहीर करण्यात आल्याने मतदान पुढे ढकलण्यात आले. ही निवडणूक राष्ट्रवादी काँग्रेस पक्षाच्या भविष्यातील राजकीय दिशा आणि एकतेसाठीही महत्त्वाची मानली जात आहे. पश्चिम महाराष्ट्रातील काही भागांमध्ये राष्ट्रवादीच्या दोन्ही गटांनी युतीत निवडणूक लढवल्याने निकालांकडे विशेष लक्ष लागले आहे.
‘वाचा मराठी’चे व्हॉट्सॲप चॅनेल येथे फॉलो करा!
‘वाचा मराठी’चा व्हॉट्सअप ग्रुप जॉईन करण्यासाठी येथे क्लिक करा
वाचा मराठी’चा व्हॉट्सअप ग्रुप-3 जॉईन करण्यासाठी येथे क्लिक करा!
‘वाचा मराठी’चा व्हॉट्सअप ग्रुप-2 जॉईन करण्यासाठी येथे क्लिक करा