Friendship Day : भारतात ऑगस्ट महिन्याच्या पहिल्या रविवारी फ्रेंडशिप डे साजरा केला जातो. हा दिवस मैत्रीच्या नावावर आहे. भारतात वेगवेगळ्या क्षेत्रात अशा अनेक मित्रांच्या जोड्या आहेत, ज्यांच्या मैत्रीचं उदाहरण दिलं जातं. यामध्ये केवळ चित्रपट किंवा राजकीय जगतातीलच नव्हे तर व्यावसायिक जगतातील अनेक जोडप्यांचाही समावेश आहे. फ्रेंडशिप डेच्या निमित्तानं बिझनेसमधील अशा जोड्या सांगणार आहोत, ज्या तुम्हाला कदाचित माहीत नसतील. त्यांची मैत्री अनेक वर्षांपासून टिकली नाही आणि काळाच्या ओघात अधिक घट्ट होत आहे.
रतन टाटा आणि शंतनू नायडू:
रतन टाटा आणि त्यांचा २८ वर्षीय तरुण मित्र शंतनू नायडू यांची मैत्री खूप प्रसिद्ध आहे. वास्तविक, २०२१ मध्ये रतन टाटा यांचा एक व्हिडिओ समोर आला होता, ज्यामध्ये त्यांनी शंतनू नायडूंसोबत त्यांचा ८४वा वाढदिवस साजरा केला होता. या व्हिडिओमध्ये शंतनूनं रतन टाटा यांच्या खांद्यावर हात ठेवला आहे. शंतनू टाटा समूहात काम करतो, पण तो रतन टाटांचा कर्मचारी कमी आणि मित्र जास्त. दोघांचं बाँडिंग खूप चांगलं आहे. शंतनू नायडू यांनी अमेरिकेतील कॉर्नेल विद्यापीठातून एमबीए केलं आहे. शंतनू जुलै २०१८ पासून उपमहाव्यवस्थापक म्हणून रतन टाटा यांच्या कार्यालयात कार्यरत आहेत. भटक्या कुत्र्यांसाठी केलेल्या कामामुळं शंतनू रतन टाटा यांच्या जवळ आला. शंतनूची स्वतःची कंपनी आहे, मोटोपॉज, जी कुत्र्यांसाठी गडद रिफ्लेक्टर कॉलरमध्ये चमकते.
राधेश्याम अग्रवाल आणि राधेश्याम गोयंका:
इमामीचे संस्थापक राधेश्याम अग्रवाल आणि राधेश्याम गोयंका यांची बालपणापासून मैत्री आहे. दोन्ही मित्रांनी केवळ २० हजार रुपयांपासून व्यवसाय सुरू केला. आज त्यांनी उभारलेला इमामी समूहाचा व्यवसाय २५ हजार कोटी रुपयांचा आहे. दोघांची मैत्री लहानपणापासून सुरू झाली आणि व्यावसायिक भागीदारी झाल्यानंतरही ती कायम आहे. राधेश्याम गोयंका आणि राधेश्याम अग्रवाल यांनी कोलकाता येथील एकाच शाळेत शिक्षण घेतलं. दोघांची ओळख एका कॉमन फ्रेंडच्या माध्यमातून झाली होती. फेब्रुवारी २०२२ मध्ये, दोन्ही संस्थापकांनी इमामी लिमिटेडमधील त्यांच्या कार्यकारी भूमिका सोडण्याचा निर्णय घेतला. गोयंका एप्रिल २०२२ पासून कंपनीचे बिगर कार्यकारी अध्यक्ष आहेत, तर अग्रवाल हे मानद अध्यक्ष आहेत.
वॉरन बफे आणि बिल गेट्स:
मायक्रोसॉफ्टचे बिल गेट्स आणि बर्कशायर हॅथवेचे मालक वॉरन बफे हे खूप चांगले मित्र आहेत. बिल गेट्स आणि वॉरेन बफे यांच्या वयात २५ वर्षांचा फरक आहे, पण दोघेही एकमेकांचे खूप जवळचे मित्र आहेत. वॉरन बफे ९२ वर्षांचे आहेत, तर बिल गेट्स आता ६७ वर्षांचे आहेत. गेट्स यांनी २००४ पासून १५ वर्षे बर्कशायर हॅथवे बोर्डवर काम केले. त्याच वेळी, वॉरन बफे १५ वर्षे बिल आणि मेलिंडा गेट्स फाउंडेशनचे विश्वस्त होते. गेट्स आणि बफे यांची मैत्री ९०च्या दशकात सुरू झाली. दोघेही अनेक कार्यक्रमांमध्ये एकत्र दिसले आहेत. अनेक प्रकारे त्यांचे विचारही खूप सारखे आहेत.
हेही वाचा – दिलीप कुमार ‘त्या’ गोष्टीसाठी पाकिस्तानात गेले आणि बाळासाहेबांनी मैत्रीच तोडून टाकली!
मुकेश अंबानी आणि गौतम अदानी:
रिलायन्स इंडस्ट्रीजचे चेअरमन मुकेश अंबानी आणि अदानी ग्रुपचे चेअरमन गौतम अदानी हे देखील खूप चांगले मित्र आहेत. दोघांची मैत्री २०१४ नंतर झाल्याचं बोललं जातं. गौतम अदानी यांच्या मोठ्या मुलाच्या लग्नासाठी मुकेश आणि नीता अंबानीही गोव्याला गेले होते. तर मुकेश अंबानी यांनी रिलायन्स फाऊंडेशनच्या हॉस्पिटलच्या लॉन्चिंगवेळी गौतम अदानी यांना फोन केला होता.
वॉरन बफे आणि चार्ली मुंगेर:
वॉरन बफे आणि त्यांचे व्यावसायिक भागीदार चार्ली मुंगेर हे दीर्घकाळापासूनचे मित्र आहेत. दोघांच्या मैत्रीला ६० वर्षांहून अधिक वर्षे झाली आहेत. वॉरन बफे बर्कशायर हॅथवे या अमेरिकन कंपनीचे मालक आहेत, तर मुंगेर चार्ली कंपनीचे उपाध्यक्ष आहेत. दोघांची पहिली भेट १९५९ मध्ये एका डिनर दरम्यान झाली होती. त्यांनी डेम्पस्टरमध्ये आपली पहिली मिलियन डॉलरची गुंतवणूक केली. आज बर्कशायर हॅथवेची अनेक कंपन्यांमध्ये गुंतवणूक आहे. यामध्ये अॅपल, बँक ऑफ अमेरिका, अमेरिकन एक्सप्रेस, कोका कोला, जनरल मोटर्स, मूडीज आणि व्हेरिझॉन यांचा समावेश आहे. वॉरन बफे मुंगेर यांना आपला सर्वात विश्वासू मानतात.
हेही वाचा – International Friendship Day 2022 : फ्रेंडशिप डे उगाच साजरा नाही करत! त्यालाही एक इतिहास आहे…
मुकेश अंबानी आणि आनंद जैन:
रिलायन्स इंडस्ट्रीजचे अध्यक्ष मुकेश अंबानी आणि जय कॉर्प लिमिटेडचे अध्यक्ष आनंद जैन हे खूप चांगले मित्र आहेत. मुकेश अंबानी त्यांच्या व्यवसाय आणि राजकीय बाबतीत अनेकदा आनंद जैन यांचा सल्ला घेतात. मुकेश आणि आनंद दोघेही वर्गमित्र आहेत. मुकेश यांचे वडील धीरूभाई अंबानी यांनी आनंद जैन यांना आपल्या मुलाप्रमाणे मानलं. आनंद जैन अनेकदा रिलायन्सच्या मुख्यालयात मुकेश अंबानींना भेटायला येतात.
