Modi Govt Give Good News To Farmers : मोदी सरकारच्या गेल्या आठ वर्षांच्या काळात गहू आणि धानाच्या खरेदीत लक्षणीय वाढ झाली आहे. किमान आधारभूत किंमत (MSP) आणि इतर राज्यांकडून खरेदी केल्यामुळे ही वाढ दिसून आली आहे. अन्न मंत्रालयाच्या एका वरिष्ठ अधिकाऱ्याने याबाबत माहिती दिली. अन्नधान्य खरेदी आणि वितरणासाठी नोडल एजन्सी असलेल्या भारतीय अन्न महामंडळाने (FCI) मोठ्या प्रमाणात गहू आणि धान खरेदी केल्यामुळे एमएसपी अंतर्गत येणाऱ्या शेतकऱ्यांची संख्याही वाढली आहे.
गहू आणि धानाच्या केंद्रीय खरेदीत लक्षणीय वाढ
अन्न मंत्रालयाचे अतिरिक्त सचिव सुबोध सिंह यांनी सांगितले की २०१३-१४ आणि २०२१-२२ या विपणन हंगामात गहू आणि धानाच्या केंद्रीय खरेदीत लक्षणीय वाढ झाली आहे. खरेदीचा आधार वाढला आहे आणि आम्ही आता अधिक राज्यांमधून अन्नधान्य खरेदी करत आहोत. या काळात एमएसपीमध्येही लक्षणीय वाढ झाली आहे. ते म्हणाले की हिमाचल प्रदेश, आसाम आणि त्रिपुरामध्ये खरेदी होत आहे. ते म्हणाले की, एफसीआयने राजस्थानमधून धान खरेदी सुरू केली आहे. २०१३-१४ सालापासून गहू व धानाचे उत्पादनही वाढले आहे.
गव्हाचा एमएसपी २१२५ रुपये प्रति क्विंटल
गव्हाच्या बाबतीत, २०१३-१४ मधील २५०.७२ लाख टन खरेदी २०२१-२२ मध्ये ४३३.४४ लाख टन झाली. खरेदी केलेल्या गव्हाचे मूल्य ३३८४७ कोटी रुपयांवरून ८५६०४ कोटी रुपये झाले. सिंह म्हणाले की २०१६-१७ मध्ये २०.४७ लाख शेतकऱ्यांच्या तुलनेत २०२१-२२ मध्ये गहू पिकवणाऱ्या ४९.२ लाख शेतकऱ्यांना लाभ मिळाला. २०१६-१७ पूर्वी लाभ झालेल्या शेतकऱ्यांची आकडेवारी उपलब्ध नाही. गव्हाचा एमएसपी २१२५ रुपये प्रति क्विंटल करण्यात आला आहे. २०१३-१४ मध्ये ते १३५० रुपये प्रति क्विंटल होते. म्हणजेच या आठ वर्षांत गव्हाच्या आधारभूत किमतीत ५७ टक्के वाढ झाली आहे.
हेही वाचा – Smart Deposit Scheme : होणार ‘मोठी’ कमाई..! ‘या’ स्कीममध्ये मिळेल ८.३०% पर्यंत रिटर्न; ‘अशी’ करा गुंतवणूक!
धानाबद्दल बोलायचे झाल्यास, २०१३-१४ मधील १३४५ रुपये प्रति क्विंटलच्या तुलनेत एमएसपीमध्ये ५३ टक्क्यांनी वाढ झाली आहे. सध्या ते २०६० रुपये प्रतिक्विंटल झाले आहे. २०१३-१४ मध्ये ४७५.३० लाख टनांच्या तुलनेत २०२१-२२ (ऑक्टोबर-सप्टेंबर) मध्ये ८५७ लाख टन धान खरेदी वाढली आहे. २०२१-२२ या वर्षात भातशेतकऱ्यांना दिलेले एमएसपी मूल्य पूर्वीच्या ६४००० कोटी रुपयांवरून सुमारे १.७ लाख कोटी रुपयांपर्यंत वाढले आहे.
‘वाचा मराठी’चा व्हॉट्सअप ग्रुप जॉईन करण्यासाठी येथे क्लिक करा!