Supreme Court On Harish Rana Case : गेल्या 12 वर्षांपासून एका खाटेवर न हलता, न बोलता पडून असलेला तरुण, ज्याचं आयुष्य केवळ श्वासोच्छवासापुरतं उरलं आहे. आज त्याच्या भवितव्याचा निर्णय होणार आहे. गाझियाबादमधील हरीश राणा या तरुणाच्या प्रकरणात आज सुप्रीम कोर्ट इच्छामृत्यू (Passive Euthanasia) संदर्भात आपला अंतिम निकाल देणार आहे.

‘जिवंत प्रेत’ बनलेलं आयुष्य

हरीश राणा पूर्णतः 100% दिव्यांग आहे. गेल्या 12 वर्षांपासून तो ना स्वतः हालचाल करू शकतो, ना बोलू शकतो, ना कोणत्याही प्रकारची प्रतिक्रिया देतो. डॉक्टरांच्या मते त्याची अवस्था Permanent Vegetative State मध्ये आहे. या दीर्घकाळ चाललेल्या वेदनादायक अवस्थेमुळे त्याचे वृद्ध आई-वडील मानसिक, भावनिक आणि आर्थिकदृष्ट्या पूर्णपणे खचले आहेत.

आई-वडिलांनीच मागितली मुलासाठी इच्छामृत्यू

मुलाच्या बरे होण्याची सर्व आशा संपल्यानंतर, हरीशच्या आई-वडिलांनी स्वतः सुप्रीम कोर्टात याचिका दाखल करत इच्छामृत्यूची मागणी केली. ही मागणी त्यांनी क्रूरतेपोटी नव्हे, तर असंख्य वेदनांपासून मुलाला मुक्त करण्यासाठी केली आहे.

AIIMS चा धक्कादायक अहवाल

सुप्रीम कोर्टाच्या आदेशानुसार AIIMS (एम्स) ने हरीश राणाच्या वैद्यकीय स्थितीचा सविस्तर अहवाल सादर केला. या अहवालात स्पष्ट शब्दांत नमूद करण्यात आलं आहे की, “हरीश राणा कधीही बरा होण्याची कोणतीही शक्यता नाही.” हा अहवाल पाहून न्यायमूर्ती परदीवाला आणि न्यायमूर्ती के. व्ही. विश्वनाथन यांच्या खंडपीठाने तीव्र दुःख व्यक्त केलं.

न्यायमूर्ती परदीवाला म्हणाले, “हा अत्यंत वेदनादायक आणि दुर्दैवी अहवाल आहे. हा निर्णय आमच्यासाठी खूप कठीण आहे.”

कुटुंबीयांशी थेट संवाद साधण्याचा आदेश

सुप्रीम कोर्टाने या प्रकरणात अत्यंत संवेदनशील भूमिका घेत, व्हिडिओ कॉन्फरन्सऐवजी प्रत्यक्ष भेटून पालकांशी संवाद साधण्याचा निर्णय घेतला. 13 जानेवारी रोजी दुपारी 3 वाजता, हरीश राणाच्या आई-वडिलांना सुप्रीम कोर्टाच्या कमिटी रूममध्ये बोलावण्यात आलं. कोर्टाने त्यांच्या भावना, वेदना आणि निर्णय समजून घेतल्यानंतरच आज अंतिम निकाल देण्याचं ठरवलं आहे.