Telangana Stray Dogs Killed : तेलंगणा राज्यातून मानवतेला काळीमा फासणारी धक्कादायक घटना समोर आली आहे. कामारेड्डी जिल्ह्यातील पाच गावांमध्ये तब्बल 200 भटक्या कुत्र्यांना विष देऊन आणि प्राणघातक इंजेक्शन देऊन ठार मारण्यात आल्याचा आरोप करण्यात आला आहे. या प्रकरणी दोन ग्रामपंचायत सरपंच, त्यांचे पती आणि इतर मिळून 9 जणांविरोधात गुन्हा दाखल करण्यात आला आहे.

ही घटना भवानीपेट, पालवंचा, फरीदपेट, वाडी आणि बंदारामेश्वरपल्ली या गावांमध्ये घडली असून, अवघ्या दोन ते तीन दिवसांत इतक्या मोठ्या प्रमाणावर कुत्र्यांची हत्या झाल्याने संपूर्ण देशात संतापाची लाट उसळली आहे.

तक्रार कोणी केली?

स्ट्रे अ‍ॅनिमल फाउंडेशन ऑफ इंडिया या संस्थेचे Animal Cruelty Prevention Manager आदुलापुरम गौतम यांनी 12 जानेवारी 2026 रोजी माचारड्डी पोलीस ठाण्यात अधिकृत तक्रार दाखल केली. त्यांच्या म्हणण्यानुसार, ही संपूर्ण कारवाई संबंधित ग्रामपंचायतींच्या सरपंचांच्या आदेशावरून करण्यात आली.

हेही वाचा – पुण्यात मतदारांना लुभावण्यासाठी अनोखी शक्कल! वॉशिंग मशीन, चांदीची भांडी आणि पैशांचे लिफाफे वाटपाचा धक्कादायक प्रकार

नेमकं काय घडलं?

आदुलापुरम यांनी सांगितले की, 12 जानेवारी रोजी दुपारी सुमारे 3 वाजता त्यांना या सामूहिक हत्येबाबत ठोस माहिती मिळाली. सायंकाळी 6 वाजता ते एका मित्रासह भवानीपेट गावात पोहोचले असता येल्लम्मा मंदिराच्या मागील पेड्डाचेर्वु परिसरात अनेक कुत्र्यांचे मृतदेह आढळून आले.

तक्रारीनुसार, किशोर पांडे नावाच्या व्यक्तीला कुत्र्यांना मारण्याची जबाबदारी देण्यात आली होती. कुत्र्यांना

विषारी इंजेक्शन देण्यात आले
अन्नात विष मिसळण्यात आले

यामुळे त्यांचा वेदनादायक मृत्यू झाला.

निवडणूक वचनासाठी अमानुष कारवाई?

मिळालेल्या माहितीनुसार, डिसेंबर महिन्यात ग्रामपंचायत निवडणुकीपूर्वी गावकऱ्यांनी उमेदवारांकडे भटक्या कुत्रे आणि माकडांच्या समस्येवर तोडगा काढण्याची मागणी केली होती.
आरोप असा आहे की, नसबंदी व लसीकरणासारखे मानवी उपाय न करता थेट कुत्र्यांचा बळी देण्यात आला.

पोलिसांनी काय कारवाई केली?

पोलिसांनी या प्रकरणात Prevention of Cruelty to Animals Act, 1960 अंतर्गत गुन्हा नोंदवला आहे.
कुत्र्यांच्या शरीरातून मिळालेल्या विषाचे नमुने फॉरेन्सिक तपासणीसाठी पाठवण्यात आले आहेत.

पोलिसांच्या म्हणण्यानुसार, “कुत्र्यांना इंजेक्शनद्वारे विष देण्यात आले असून, काही प्रकरणांत त्यांच्या अन्नातही विष मिसळण्यात आले.”