Baby Planning Fertility Mistakes : पालक बनण्याचं स्वप्न हे प्रत्येक जोडप्यासाठी आयुष्यातील सर्वात आनंददायक क्षणांपैकी एक असतं. मात्र आजच्या तणावपूर्ण आणि धकाधकीच्या जीवनशैलीमुळे अनेक दाम्पत्यांना बाळ कन्सिव्ह करण्यात अडचणी येत आहेत. यामागचं एक प्रमुख कारण म्हणजे फर्टिलिटी म्हणजेच प्रजननक्षमता कमी होणं.

फक्त महिलाच नाही, तर पुरुषांमध्येही ही समस्या दिसून येते. बाळासाठी केवळ भावनिक तयारी पुरेशी नसते, तर शारीरिक आरोग्य आणि विशेषतः फर्टिलिटी योग्य असणं अत्यावश्यक आहे. दुर्दैवाने काही चुकीच्या सवयी आणि दुर्लक्ष यामुळे फर्टिलिटी हळूहळू कमी होत जाते.

चला तर मग जाणून घेऊया अशा 5 मोठ्या चुका ज्या तुमच्या फर्टिलिटीवर थेट परिणाम करतात आणि त्या वेळेत सुधारल्या नाहीत, तर बाळाची वाट आणखी कठीण होऊ शकते.

वजनाकडे दुर्लक्ष

डॉक्टरांच्या म्हणण्यानुसार, वाढलेलं किंवा खूपच कमी वजन फर्टिलिटीवर परिणाम करतं. शरीराचं योग्य वजन राखणं हे बाळ कन्सिव्ह करण्यासाठी अतिशय महत्त्वाचं आहे. वजनाच्या असंतुलनामुळे हार्मोन्समध्ये बिघाड होतो आणि प्रजननक्षमता कमी होते.

हेही वाचा – शून्य अनुभवात पेट्रोल पंप सुरू करायचाय? काय लागेल, कुठं जायचं, सगळं समजून घ्या!

धूम्रपान व अल्कोहोलचे सेवन

सिगारेट किंवा दारूचं सेवन करणाऱ्यांमध्ये फर्टिलिटी डाउन होण्याचा धोका अधिक असतो. पुरुषांमध्ये स्पर्म क्वालिटी कमी होते आणि महिलांमध्ये ओव्ह्युलेशनमध्ये अडथळा येतो. या सवयी केवळ प्रजननक्षमतेसाठीच नाही, तर संपूर्ण आरोग्यासाठी धोकादायक आहेत.

असंतुलित आहार

जंक फूड्स, फॅटी पदार्थ, पॅक्ड स्नॅक्स यांचा जास्त वापर केल्यास शरीरात इन्फ्लेमेशन वाढतं आणि इन्सुलिन रेझिस्टन्ससारख्या समस्या होतात. या सगळ्यांचा फर्टिलिटीवर नकारात्मक परिणाम होतो. त्यामुळे आहारात ताज्या भाज्या, फळं, नट्स, डाळी आणि संपूर्ण धान्यांचा समावेश करावा.

हार्मोनल असंतुलनाकडे दुर्लक्ष

महिलांमध्ये वेळेवर पाळी न येणं, खूप ब्लीडिंग किंवा खूप कमी ब्लीडिंग, पीरियडमध्ये अत्याधिक वेदना – हे सगळं हार्मोनल गडबडीचं लक्षण आहे. पॉलिसिस्टिक ओव्हेरियन सिंड्रोम (PCOS) ही अशी एक स्थिती आहे, जी थेट फर्टिलिटीवर परिणाम करते. वेळेत निदान आणि उपचार आवश्यक आहेत.

सततचा मानसिक ताण

आजच्या काळात कामाच्या तणावामुळे स्ट्रेस घेणं सर्वसामान्य झालंय. पण तुम्हाला माहीत आहे का? स्ट्रेसमुळे हार्मोनल इम्बॅलन्स निर्माण होतो आणि त्यामुळेही फर्टिलिटी घटते. ध्यान, योगासने, निसर्गसंपन्न ठिकाणी फिरणं – या गोष्टी स्ट्रेस कमी करण्यास मदत करू शकतात.