Petrol Diesel Price Drop India : भारतातील इंधन दरांमध्ये लवकरच घट होण्याची शक्यता आहे. वाढत्या महागाईच्या पार्श्वभूमीवर ही एक मोठी दिलासा देणारी बातमी आहे. केंद्रीय पेट्रोलियम आणि नैसर्गिक वायू मंत्री हरदीप सिंग पुरी यांनी गुरुवारी पत्रकार परिषदेत सूचित केलं की, कच्च्या तेलाच्या किंमतींमध्ये घसरण होण्याची शक्यता आहे, कारण भारताने आपली ऊर्जा आयात धोरणात मोठे बदल केले आहेत.

भारताचं बदललेलं ऊर्जा धोरण

पुरी यांनी सांगितलं की, “तेलाच्या किंमती लवकरच कमी होतील, कारण आपल्याकडे आता नवीन तेल स्रोत उपलब्ध झाले आहेत. आम्ही फक्त मोजक्या देशांवर अवलंबून राहिलेलो नाही.”

भारत आता केवळ २७ देशांऐवजी ४० देशांमधून कच्च्या तेलाची आयात करत आहे. त्यामुळे देशातील तेल साठा चांगला असून, भविष्यातील किंमती नियंत्रणात राहण्याची शक्यता आहे.

भारताचं जागतिक तेल बाजारात योगदान

हरदीप पुरी यांनी सांगितलं की, “आज जागतिक तेल मागणीत भारताचा वाटा १६% आहे आणि येत्या काही वर्षांत तो २५% पर्यंत पोहोचू शकतो.” याचा अर्थ असा की भारत फक्त तेलाचा ग्राहक राहिला नाही, तर जागतिक ऊर्जा बाजाराला दिशा देणारा देश बनतो आहे.

हेही वाचा – उत्तर प्रदेशच्या गावांची कमाल! ५० कोरड्या नद्या पुन्हा केल्या जिवंत

“एक दरवाजा बंद झाला, तरी दुसरा उघडतो”

रशिया व अमेरिकेतील व्यापार धोरणांबाबत विचारण्यात आलं असता, पुरी यांनी स्पष्ट केलं की भारत स्वतंत्र निर्णय घेऊ शकतो आणि कोणत्याही संकटाचा तोडगा शोधू शकतो. त्यांनी म्हटलं, “एक दरवाजा बंद झाला, तरी दुसरा नक्कीच उघडतो.”

रशियातून स्वस्त तेल

पुरी यांनी पुन्हा एकदा स्पष्ट केलं की रशियाकडून स्वस्त तेल घेणं केवळ भारताच्या दृष्टीने फायदेशीर नाही, तर जागतिक अर्थव्यवस्थेसाठीही आवश्यक होतं. “जर रशियाला तेल व्यापारातून बाहेर काढलं असतं, तर दर १३० डॉलर प्रति बॅरलपर्यंत पोहोचले असते,” असं त्यांनी सांगितलं.