Swadhar Scheme : शालेय शिक्षणानंतर अनेक विद्यार्थी पुढील शिक्षणासाठी घर सोडून इतर शहरात जातात. परंतु अनेक वेळा इतर शहरात राहण्याचा, खाण्यापिण्याचा खर्च इतका वाढतो की क्षमता असूनही पैशाअभावी विद्यार्थ्यांना अभ्यास करता येत नाही. या समस्येवर मात करण्यासाठी महाराष्ट्र सरकारने स्वाधार योजना आणली. स्वाधार योजनेंतर्गत प्रत्येकाला रु. ५१ हजार दिले जातात.
महाराष्ट्र स्वाधार योजना काय आहे?
एकही विद्यार्थी पुढील शिक्षणापासून वंचित राहू नये यासाठी महाराष्ट्र स्वाधार योजना सुरू करण्यात आली. वसतिगृहात आर्थिकदृष्ट्या कमकुवत विद्यार्थ्यांनाही प्रवेश मिळतो. मात्र विद्यार्थ्यांना वसतिगृहात प्रवेश मिळत नसेल तर त्यांना या योजनेतून मदत केली जाते.
कोण पात्र असेल?
- आर्थिक दुर्बल विद्यार्थी महाराष्ट्र स्वाधार योजनेचा लाभ घेऊ शकतात.
- यामध्ये अनुसूचित जाती, अनुसूचित जमाती, नव-बौद्ध प्रवर्गातील, ज्यांनी किमान दहावीपर्यंत शिक्षण घेतले आहे, अशा विद्यार्थ्यांना मदत दिली जाईल. यानंतर इयत्ता ११वी, १२वी, डिप्लोमा कोर्स, अव्यावसायिक अभ्यासक्रम आणि राहणीमानासाठी शासनाकडून महाराष्ट्र स्वाधार योजनेतून ५१ हजारांची मदत दिली जाते.
- लाभार्थीच्या कुटुंबाचे वार्षिक उत्पन्न अडीच लाखांपेक्षा जास्त नसावे. इयत्ता १० वी किंवा १२ वी नंतर विद्यार्थ्याला कोणत्याही अभ्यासक्रमात प्रवेश घ्यायचा असेल तर महाराष्ट्र स्वाधार योजनेचा लाभ मिळण्यासाठी त्या अभ्यासक्रमाचा कालावधी दोन वर्षांपेक्षा जास्त नसावा.
- अर्जदारांना मागील वर्गात किमान ६० टक्के गुण असणे आवश्यक आहे. दिव्यांग उमेदवारांसाठी ४० टक्के गुण आवश्यक आहेत.
- विद्यार्थ्यांचे स्वतःचे बँक खाते असावे.
- अर्जदार महाराष्ट्राचे कायमचे रहिवासी असले पाहिजेत.
हेही वाचा – PM Kisan Samman Nidhi Yojana : शेतकऱ्यांना १३वा हप्त्याचे पैसे कधी मिळणार? ‘असा’ करा अर्ज!
महाराष्ट्र स्वाधार योजनेत किती लाभ मिळणार?
महाराष्ट्र स्वाधार योजनेत खर्चानुसार वेगवेगळी रक्कम दिली जाते. उदाहरणार्थ, बोर्डिंग सुविधेसाठी रु. २८०००, निवास सुविधेसाठी रु. १५०००, वैद्यकीय आणि अभियांत्रिकी अभ्यासक्रमांसाठी रु. ५००० आणि इतर शाखांमध्ये प्रवेश घेण्यासाठी रु. ५००० जादा दिले जातील. महाराष्ट्र स्वाधार योजनेअंतर्गत अर्ज करण्यासाठी विद्यार्थ्यांकडे अनेक कागदपत्रे असणे आवश्यक आहे.
या कागदपत्रांची आवश्यकता
- आधार कार्ड.
- मागील वर्गाची मार्कशीट.
- पत्त्याचा पुरावा.
- बँक खाते तपशील.
- उत्पन्न प्रमाणपत्र.
- जात प्रमाणपत्र.
- मोबाईल नंबर.
- पासपोर्ट आकाराचा फोटो.