Fake SIM Card Fraud : एखाद्या गुन्ह्याशी दुरान्वयेही संबंध नसताना केवळ तुमच्या नावावर असलेल्या सिम कार्डमुळे तुम्हाला हत्येसारख्या गंभीर गुन्ह्यात आरोपी ठरवले गेले तर? ऐकायला हे एखाद्या चित्रपटातील कथेसारखे वाटत असले, तरी कर्नाटकच्या एका शेतकऱ्यासोबत हा थरार प्रत्यक्षात घडला आहे. बनावट ओळखपत्रांच्या सहाय्याने घेतलेल्या सिम कार्डमुळे एका निष्पाप शेतकऱ्याचे आयुष्य दोन वर्षे नरक बनले होते.
नेमके प्रकरण काय आहे?
१८ सप्टेंबर २०२४ रोजी बेंगळुरू येथील बागुलूर पोलीस ठाण्याच्या हद्दीत २३ वर्षीय रेवंत कुमार या तरुणाचा मृतदेह आढळला होता. त्याच्या शरीरावर जखमांच्या अनेक खुणा होत्या. या हत्येचा तपास करताना पोलिसांना एका मोबाईल नंबरचा सुगावा लागला. तांत्रिक तपासाअंती तो नंबर होसाकोटे येथील ३६ वर्षीय शेतकरी एल.एस. पुनीत यांच्या नावावर असल्याचे समोर आले. पोलिसांनी पुनीत यांना संशयित मानून चौकशी सुरू केली, मात्र पुनीत यांनी असा कोणताही नंबर आपल्याकडे नसल्याचे वारंवार सांगितले.
हेही वाचा – कोरोनानंतर आता हंताव्हायरसची धास्ती! लक्झरी जहाजावर नेमकं काय घडलं?
ओळखपत्राची अशी झाली छेडछाड
पोलीस तपासात एक धक्कादायक सत्य समोर आले. सुमारे १० वर्षांपूर्वी, म्हणजेच २०१५ मध्ये सरजापुरा येथील एका मोबाईल शॉपमधून पुनीत यांच्या नावावर सिम कार्ड खरेदी करण्यात आले होते. धक्कादायक बाब म्हणजे, पुनीत यांच्या मतदार ओळखपत्राचा (Voter ID) वापर करून त्यावर दुसऱ्या व्यक्तीचा फोटो लावून हे सिम कार्ड मिळवण्यात आले होते. गुन्हेगारांनी मूळ कागदपत्रांशी छेडछाड करून हे बनावट सिम कार्ड सक्रिय केले आणि त्याचा वापर हत्येसारख्या गुन्ह्यात केला.
दोन वर्षांचा मनस्ताप आणि निर्दोष सुटका
या प्रकरणाच्या सखोल चौकशीनंतर आणि पुनीत यांची बाजू ऐकून घेतल्यानंतर, तपास अधिकाऱ्यांनी अखेर मान्य केले की पुनीत यांचा या हत्येशी किंवा त्या सिम कार्डशी कोणताही संबंध नाही. मे २०२६ मध्ये त्यांना क्लीन चिट देण्यात आली. मात्र, या दोन वर्षात हत्येचा आरोप आणि पोलीस चौकशी यामुळे पुनीत यांना जो मानसिक आणि सामाजिक त्रास सहन करावा लागला, त्याची भरपाई होणे अशक्य आहे. आता पुनीत यांनी त्यांच्या कागदपत्रांचा गैरवापर करणाऱ्या अज्ञात व्यक्तीविरुद्ध गुन्हा दाखल केला आहे.
अशा संकटातून स्वतःचा बचाव कसा करावा?
तुमच्यासोबत असा प्रकार घडू नये यासाठी खालील खबरदारी घेणे अत्यंत आवश्यक आहे:
- ओळखपत्रांची सुरक्षा: तुमची ओळखपत्रे (विशेषतः आधार आणि मतदार ओळखपत्र) कोणालाही देताना त्याचा उद्देश स्पष्टपणे विचारात घ्या. कागदपत्रांच्या झेरॉक्स प्रतीवर त्याचा वापर कशासाठी होणार आहे, हे स्पष्टपणे नमूद करा.
- बायोमेट्रिक लॉक: सध्या ओळख पटवण्यासाठी सर्वाधिक वापर केला जातो. त्यामुळे तुमची वैयक्तिक माहिती सुरक्षित ठेवण्यासाठी बायोमेट्रिक लॉक वापरणे अत्यंत सुरक्षित ठरते. हे फिचर अधिकृत ॲपच्या होम पेजवर उपलब्ध असते.
- अनधिकृत विक्रेत्यांकडून सिम खरेदी टाळा: रस्त्याच्या कडेला तंबू लावून किंवा अनधिकृत दुकानातून सिम कार्ड खरेदी करणे टाळा. अशा ठिकाणी तुमच्या कागदपत्रांचा वारंवार वापर करून अतिरिक्त सिम कार्ड सक्रिय केले जाण्याची भीती असते, जे पुढे गुन्हेगारांना विकले जाऊ शकतात.
- तुमच्या नावावरील सिम कार्ड तपासा: तुमच्या नावावर सध्या किती मोबाईल नंबर सुरू आहेत, हे तपासणे आता सोपे झाले आहे. ‘संचार साथी’ (Sanchar Saathi) या केंद्र सरकारच्या अधिकृत पोर्टलचा वापर करून तुम्ही हे तपासू शकता.
तुमच्या नावावरील सिम कार्ड तपासण्याची प्रक्रिया:
१. ‘संचार साथी’ पोर्टलच्या होम पेजवर जा.
२. तिथे ‘Know Mobile Connections in Your Name’ या पर्यायावर क्लिक करा.
३. तुमचा सध्याचा मोबाईल नंबर आणि ओटीपी प्रविष्ट करा.
४. तुमच्या नावावर नोंदणीकृत असलेले सर्व क्रमांक स्क्रीनवर दिसतील.
५. जर एखादा नंबर तुम्ही वापरत नसाल, तर तो त्वरित बंद करण्यासाठी तिथूनच तक्रार नोंदवा.
काळजी घ्या, सजग राहा आणि आपली ओळख सुरक्षित ठेवा!
‘वाचा मराठी’चे व्हॉट्सॲप चॅनेल येथे फॉलो करा!
‘वाचा मराठी’चा व्हॉट्सअप ग्रुप जॉईन करण्यासाठी येथे क्लिक करा
वाचा मराठी’चा व्हॉट्सअप ग्रुप-3 जॉईन करण्यासाठी येथे क्लिक करा!
‘वाचा मराठी’चा व्हॉट्सअप ग्रुप-2 जॉईन करण्यासाठी येथे क्लिक करा!