Security Guards Stabbed Mumbai : मुंबईतील मिरा रोड परिसरातील नया नगरमध्ये एका ३१ वर्षीय तरुणाने दोन सुरक्षारक्षकांवर चाकूने हल्ला केल्याची धक्कादायक घटना घडली आहे. आरोपीने हल्ला करण्यापूर्वी रक्षकांना त्यांचा धर्म विचारला आणि त्यांना ‘कलमा’ पठण करण्याची सक्ती केल्याचा आरोप आहे. या घटनेमुळे परिसरात तणावाचे वातावरण असून पोलीस आणि राज्य दहशतवादविरोधी पथक (ATS) या प्रकरणाचा सखोल तपास करत आहेत.
मध्यरात्रीचा थरार आणि हल्ल्याचे स्वरूप
मिळालेल्या माहितीनुसार, ही घटना सोमवारी पहाटे ४ च्या सुमारास व्हॉकहार्ट हॉस्पिटलच्या पाठीमागे असलेल्या एका बांधकामाधीन इमारतीजवळ घडली. राजकुमार मिश्रा आणि सुब्रतो सेन हे दोन सुरक्षारक्षक तिथे कर्तव्यावर असताना आरोपी झैब झुबेर अन्सारी याने त्यांना गाठले. आरोपीने त्यांना इस्लाममधील मूलभूत सिद्धांतांचे (कलमा) पठण करण्यास सांगितले. जेव्हा त्यांनी नकार दिला किंवा त्यांना ते जमले नाही, तेव्हा अन्सारीने त्यांच्यावर चाकूने सपासप वार केले.
या भीषण हल्ल्यात दोन्ही रक्षक गंभीर जखमी झाले आहेत. जखमी राजकुमार मिश्रा यांनी स्वतःला सावरून हॉस्पिटल गाठले, तर सुब्रतो सेन यांना त्यांच्या एका शेजाऱ्याने, नायब शेख यांनी तातडीने रुग्णालयात दाखल केले. दोन्ही रक्षकांवर सध्या उपचार सुरू असून त्यांची प्रकृती गंभीर असल्याचे सांगण्यात येत आहे.
आरोपीचा पार्श्वभूमी आणि संशयास्पद साहित्य
आरोपी झैब अन्सारी हा उच्चशिक्षित असून तो अनेक वर्षे अमेरिकेत वास्तव्यास होता. तिथे नोकरी न मिळाल्याने तो काही काळापूर्वी भारतात परतला होता. मिरा रोड परिसरात तो एकटाच राहत होता आणि उदरनिर्वाहासाठी ऑनलाईन केमिस्ट्री क्लासेस घेत असे. पोलिसांनी सीसीटीव्ही फुटेजच्या आधारे अवघ्या ९० मिनिटांत त्याला अटक केली.
तपासादरम्यान पोलिसांना अन्सारीच्या घरातून आणि इलेक्ट्रॉनिक उपकरणांमधून धक्कादायक माहिती मिळाली आहे. त्याच्याकडे सापडलेल्या टिपणांमध्ये ‘ISIS’, ‘लोन वुल्फ’, ‘जिहाद’ आणि ‘गाझा’ यांसारखे शब्द आढळले आहेत. यामुळे हा केवळ वैयक्तिक रागातून केलेला हल्ला आहे की एखाद्या मोठ्या कटाचा भाग, याचा तपास पोलीस करत आहेत. तो ऑनलाईन उपलब्ध असलेल्या कट्टरपंथी साहित्यामुळे प्रभावित झाला असावा, असा प्राथमिक अंदाज व्यक्त केला जात आहे.
पोलीस कारवाई आणि जनतनेला आवाहन
नया नगर पोलिसांनी अन्सारीविरुद्ध हत्येचा प्रयत्न आणि दोन गटांमधील शत्रुत्व वाढवल्याप्रकारचे गुन्हे दाखल केले आहेत. ठाणे न्यायालयाने त्याला ४ मे पर्यंत पोलीस कोठडी सुनावली आहे. या घटनेचे गांभीर्य लक्षात घेऊन एटीएस (ATS) देखील समांतर तपास करत आहे.
मिरा रोड आणि भाईंदर परिसरातील शांतता अबाधित राखण्यासाठी पोलिसांनी जनतेला अफवांवर विश्वास न ठेवण्याचे आवाहन केले आहे. सोशल मीडियावरून कोणतीही चुकीची किंवा दिशाभूल करणारी माहिती पसरवू नये, अन्यथा कठोर कायदेशीर कारवाई केली जाईल, असा इशारा प्रशासनाने दिला आहे. आरोपीच्या मोबाईल फोनचा आणि लॅपटॉपचा फॉरेन्सिक तपास सध्या सुरू असून त्यातून अधिक धागेदोरे हाती लागण्याची शक्यता आहे.
‘वाचा मराठी’चे व्हॉट्सॲप चॅनेल येथे फॉलो करा!
‘वाचा मराठी’चा व्हॉट्सअप ग्रुप जॉईन करण्यासाठी येथे क्लिक करा
वाचा मराठी’चा व्हॉट्सअप ग्रुप-3 जॉईन करण्यासाठी येथे क्लिक करा!
‘वाचा मराठी’चा व्हॉट्सअप ग्रुप-2 जॉईन करण्यासाठी येथे क्लिक करा!